दिलवरसिंग पावरा यांच्या नेतृत्वाखाली ग्रामस्थांचा जलसंधारणासाठी पुढाकार; गावाच्या एकजुटीतून पाणी अडविण्याचा स्तुत्य उपक्रम
धडगाव प्रतिनिधी: अर्जुन पावरा
धडगाव तालुक्यातील रोषमाळ येथील सातपुड्याच्या दुर्गम आणि डोंगराळ भागातील रोषमाळ येथील मानसिंगपाडा गावात ग्रामस्थांनी एकजुटीचे दर्शन घडवत श्रमदानातून वनराई बंधाऱ्याची उभारणी केली. गावातील प्रत्येक घरातून नागरिकांनी उत्स्फूर्तपणे सहभागी होत या उपक्रमात आपले योगदान दिले. दिलवरसिंग पावरा यांच्या नेतृत्वाखाली हा उपक्रम राबविण्यात आला.
पावसाचे वाहून जाणारे पाणी अडवून त्याचा उपयोग स्थानिक पातळीवर व्हावा, जलसंधारणाला चालना मिळावी आणि गावातील पाण्याची उपलब्धता वाढविण्यास मदत व्हावी, या उद्देशाने ग्रामस्थांनी एकत्र येत वनराई बंधारा बांधण्याचे काम हाती घेतले. या कामासाठी कोणाची वाट न पाहता गावातील नागरिकांनी स्वतः पुढाकार घेत श्रमदान केले. गावातील पुरुष, युवक तसेच ज्येष्ठ नागरिकांनी एकत्र येऊन सामूहिक सहभागातून हा उपक्रम पूर्णत्वास नेला.
आजच्या काळात पाणीटंचाई आणि पावसाचे पाणी वाहून जाण्याची समस्या अनेक गावांसमोर आव्हान बनली आहे. अशा परिस्थितीत केवळ शासकीय यंत्रणांवर अवलंबून न राहता ग्रामस्थांनी स्वतः पुढाकार घेऊन जलसंधारणाची कामे करणे ही काळाची गरज आहे. मानसिंगपाडा येथील ग्रामस्थांनी श्रमदानातून केलेला हा उपक्रम ग्रामीण भागातील लोकसहभाग आणि सामूहिक प्रयत्नांचे महत्त्व अधोरेखित करणारा आहे.
वनराई बंधाऱ्यामुळे पावसाचे पाणी अडविण्यास मदत होणार असून, परिसरातील जमिनीत पाणी मुरण्यास आणि भूजलपातळी सुधारण्यास हातभार लागू शकतो. त्यामुळे अशा प्रकारचे जलसंधारणाचे उपक्रम गावाच्या भविष्यासाठी महत्त्वपूर्ण ठरू शकतात.
गावाचा विकास हा केवळ शासनाच्या योजनांमधूनच नव्हे, तर ग्रामस्थांच्या एकजुटीतून आणि लोकसहभागातूनही साध्य होऊ शकतो, याचे उदाहरण मानसिंगपाडा येथील ग्रामस्थांनी आपल्या कृतीतून दाखवून दिले आहे. ग्रामस्थांनी केलेला हा उपक्रम इतर गावांसाठीही प्रेरणादायी ठरणारा आहे.
गावातील नागरिकांनी एकत्र येऊन श्रमदानातून जलसंधारणाचे काम केल्याने परिसरात लोकसहभागातून विकासकामे करण्याची सकारात्मक भावना निर्माण झाली आहे. भविष्यातही गावाच्या पाणीप्रश्नासह इतर स्थानिक समस्यांवर अशाच प्रकारे एकजुटीने काम करण्याचा आदर्श या उपक्रमातून समोर आला आहे.
0 Comments